Սարվանգասանա կամ ուսերի վրա կանգ

ՍԱՐՎԱՆԳԱՍԱՆԱ

Սարվա-բոլոր, անգա-օրգաններ, մարմնի մասեր, այսինքն այս վարժությանը մասնակցում է ամբողջ մարմինը: Սա ամենակարևոր ասանաներից մեկն է, այնքան օգտակար, որ խորհուրդ է տրվում անել օրական մի քանի անգամ: Համարվում է ասանաների կամ դիրքերի թագուհին։

Ինչպե՞ս կատարել ասանան։ Պառկել մեջքին, մկանները թուլացնել, ձեռքերը` մարմնին զուգահեռ, ափերը` ցած, դանդաղ ներշնչել և ծնկները չծալելով` բարձրացնել ոտքերը 90 աստիճանով, ապա բարձրացնել իրանը, հենվելով արմունկներին` ձեռքերը պահել գոտկատեղին և լրիվ ուղղել իրանը: Այդ պահին ծնոտը պինդ սեղմված է լինում կրծքավանդակին: Շնչել քթով, խորը և այդ դիրքում մնալ` որքան կարող եք: Սկսնակները պետք է աստիճանաբար ավելացնեն ասանայի տևողությունը, իսկ լավ մարզվելուց հետո դարձնել 10 րոպեի: Ավարտելով` դանդաղ իջեցնել նախ` իրանը, ապա` ոտքերը և երբեք թափով չընկնել հատակին: Մի քանի վայրկյան հանգստանալ` շնչելով դանդաղ և հավասարաչափ, որպեսզի վերականգնվի նորմալ արյան շրջանառությունը: Սա հեշտ ասանա է, երեխան էլ կարող է կատարել:

Օգտակարություններ։ Ավելի շատ է նպաստում նյութափոխանակությանը, արյան շրջանառությանը և հոգեկան վիճակի բարելավմանը, քան բազմաթիվ դեղեր: Սարվանգասանայի ժամանակ ծանրության ուժն ազդում է հակառակ ուղղությամբ. վերևում գտնվող և այդ պատճառով քիչ արյուն ստացող օրգանները այժմ ներքևում են, և արյունը ներհոսում է այնտեղ սեփական ծանրության ազդեցությամբ` սրտից չպահանջելով լրացուցիչ ջանքեր: Այդ դիրքում սիրտը օգտվում է կարճ, բայց հետզհետե երկարող հանգստից, որն ավելի օգտակար է նրա համար, քան պառկած վիճակը: Արյան թարմ հոսանքը լցվում է թոքերը և վզի օրգաններն ու կազդուրում: Ծնոտի ճնշումը խոչընդոտում է ավելորդ արյան հոսքը դեպի գլուխը, ամրանում և հանգստանում են վահանագեղձը, նշագեղձերը, ուրցագեղձը:

Սարվանգասանան, սիրշասանան (գլխի կանգը) և վիպարիտա – կարանին , շնորհիվ հանգստացնող ներգործության, յուրահատուկ լրացում են հանդիսանում գրգռիչ կեցվածքների` բհուջանգասանայի (կոբրայի դիրք) և դհանուրասանայի (աղեղի դիրք) համար: Վահանագեղձը, պատկերավոր ասած, ժամանակի զգացման պատասխանատու օրգանն է: Այն մարդիկ, որոնց վահանագեղձը անբավարար է գործում, մշտապես ուշանում է, նրանց զարկերակը դանդաղ է խփում, դանդաղ են գործում աղիքները: Եվ ընդհակառակը` գերաճած վահանագեղձ ունեցողները միշտ շտապում են, արագ-արագ շնչում, աչքի են ընկնում զարկերակի հաճախականությամբ, եռանդուն աղիքներով և այնպես արագ են խոսում, որ երբեմն նրանց հասկանալ չի լինում: Բոլոր երեք վարժությունները, որոնք կապված են գլխիվայր կանգնելու հետ, նորմալացնում և կանոնավորում են այդ կարևոր օրգանի զանազան ֆունկցիաները:

Որովայնի խոռոչի ֆունկցիաները, որոնք ծանրության ուժի շնորհիվ առատորեն լցվում են արյամբ, սարվանգասանայի ժամանակ վեր են բարձրանում, ազատվում արյան ավելցուկից, իսկ անոթների պատերը, կծկվելով, վերստանում են նախկին ճկունությունը: Բավական է, որ այս վարժությունը արվի օրական 3 անգամ մի քանի րոպեով, որպեսզի բուժվի անոթների լայնացումը: Դա հատկապես կարևոր է նրանց համար, ովքեր օրվա մեծ մասը ոտքի վրա են անցկացնում: Պրոֆիլակտիկայի համար օգտակար կլինի, որ վերջիններս մի քանի անգամ սարվանգասանա անեն օրվա ընթացքում և աշխատանքից հետո: Այս վարժությունը բուժում է հեմորոյը, արգանդի կատառը և այլն: Նվազեցնում է արյան ավելցուկը որովայնի խոռոչի ներքևի օրգաններում. սրանք հանգստանում են: Սարվանգասանան, վիպարիտա -կարանին և սիրշասանան օգտակար են պատանիների համար` սեռական հասունության շրջանում, քանի որ նրանք օգնում են միտքը և ցանկությունները հեռու վանել էրոտիկ պատկերացումներից:

Ե՞րբ կատարել։ Այս դեպքում լավ է վարժություններ կատարել քնից առաջ: Քնած ժամանակ արյան ավելցուկը, որ այս ասանաների շնորհիվ դուրս է մղված լինում մարմնի այն մասերից, որտեղ դրա առկայությունն անցանկալի է, ուղղվում է դեպի գլուխը, իսկ դա կարող է օգնել մտավոր ընդունակությունների զարգացմանը: Եթե ցանկանում եք, որ մեր երեխաները նորմալ զարգանան մտավոր և այլ առումով, պետք է հոգանք, որ նրանք առնվազն օրը 3 անգամ` առավոտյան, կեսօրին և երեկոյան անեն սարվանգասանա, վիպարիտա – կարանի և սիրշասանա: Հասուն մարդիկ նույնպես պետք է կատարեն այդ վարժությունները, որպեսզի մինչև խորը ծերություն պահպանեն առողջությունը, կայտառությունը և ճկունությունը: Ծերություն անպայման չի նշանակում զառամություն և ֆիզիկական ուժերի անկում: Ինդուս-յոգերը և նրանց հետևորդներն Արևմուտքում տալիս են շոշափելի օրինակն այն բանի, որ Հաթհա-Յոգայի օգնությամբ կարելի է երկար տարիներ պահպանել նախանձելի առողջություն: Սարվանգասանայի ներգործությամբ կենսական ուժերը վատնած երիտասարդը, ինչպես և տարեց մարդը, կարող են իրենց վերածնված զգալ: Սարվանգասանան լավագույն վարժություններից է նյարդային համակարգը երիտասարդացնելու և հանգստացնելու համար:

Հեղինակ՝ Ֆեդերացիայի նախագահ Հակոբ Բաղդասարյան

Բոլոր հեղինակային իրավունքները պատկանում են Հայաստանի Յոգայի Ֆեդերացիային։ Կայքում տեղ գտած նյութերից օգտվելիս` հղումը պարտադիր է։